Torang sambut Natal 2005
Sabantar lagi torang somo masok bulan Desember berarti so nda lama lagi torang somo ba tasibu dengan berbagai perayaan Natal di lingkungan masing-masing. No karna torang yang orang perantau ada di Jakarta so musti ba siap-siap, torang pe pengurus Pinaesaan Ne Kamangta ada rencana mo beking natal seperti taon-taon lalu cuma untuk kali ini rencananya baru mo beking bulan Januari 2006. Des torang so musti dukung akang supaya samua berjalan lancer. Bagi torang pe sudara-sudara yang ada terbeban for mo basumbang bole salurkan lewat Panitia Natal terserah mo kase doi atau kase bahan makanan. For natal kali ini Panitia akan menyusun acara supaya boleh beking siang dan nda talalu sore sebab kalo beking malam nanti torang pe sudara yang tempat tinggalnya jaoh stengah mati musti cari oto for mo pulang. Nah jang lupa bagi torang pe sudara-sudara yang nda sempat terjangkau undangan atau palakat ini supaya torang baku bantu kase tau pa dorang skaligus supaya hadir dengan jang lupa tu sumbangan for natal. Khusus torang pe sudara yang mo ba natal di kampung di Kamangta jang lupa supaya kase-kase kabar sapa tau ada stou yang mo ba pesan pa dorang pe keluarga di Kamangta. Akhirnya segenap Pengurus Pinaesaan Ne Kamangta menyampaikan selamat ba baca ini torang pe "PORTAL”. Semoga ka muka nanti lebe lancar dia hadir sebagai tampa informasi baik kejadian di kampung maupun di Jakarta. Kalo ada informasi laeng supaya kase-kase kabar kamari nanti torang muat di sini. (Okke Wowiling)
Pertemuan rutin yang lalu..
Tanggal 13 November 2005, lalu ada beking pertemuan keluarga bertempat di rumah Keluarga Worotikan Wehantou, di Kelapa Gading Permai, kebaktian dipimpin oleh torang pe sudara Ferry Mandagie, seorang hamba Tuhan yang so mengingatkan pa torang samua untuk supaya dekat-dekat satu dengan laeng dan tetap baharap trus pa Tete Manis. Pada saat yang bersamaan torang pe keluarga besar dari Opa Zeth Worotikan lagi bakumpul di salah satu keluarga didaerah Jakarta Selatan. Dorang pe opa memang tumani di Kamangta dan terdaftar sebagai Hukum Tua pertama, mari torang himpun samua keluarga yang merasa orang Kamangta supaya rame-rame torang bangun desa.
Kali ini torang ucapkan terima kasih pa Bapak Rudy dan Tante Olla yang so menyediakan tampa for torang bakumpul akang serta itu makanan yang dorang so sadia for torang makng bersama. Kirannya Tuhan boleh membalas budi baik dan tetap memberkati keluarga ini.
Jalang Aspal Deng Babatu
Ada kabar torang pe kampung katanya sedang membangun jalan, dengar-dengar tu jalan so aspal sampe di daerah aer belakang dekat deng dorang Decky Kindangen perumah. Kong itu bagi talikuran kurang rupa kuala kering sampe tiap kali orang lewat situ musti tasontong sana tasontong sini dia pe kaki karena belum aspal. Kapan do tu daerah itu mo bagus dia pejalang, tolong seinga akan pa pejabat Kumtua kal perlu itu sudara-sudara yang ada rumah disitu boleh baku seinga sapa tau boleh baku bantu beking tu jalang, sebab kalo so nda mo beking no so apaley tu kampung talikuran.
Jika ada informasi kirim email ke
orangkamangta@yahoo.com
